Almal sal ’n tweede happie van dié geurige gereg wil inskep.
Genoeg vir 4 mense
Bereiding: 20 minute
Gaarmaaktyd: 45 minute
1 groot heel hoender
80 ml (1/3 k) koekmeel
sout en peper
olie
1 middelslag-ui, fyn gekap
2 knoffelhuisies, fyn gedruk
2 stukke kassia
2 heel groen brandrissies
3 heel naeltjies
2 blikke (400 g elk) tamaties
250 ml (1 k) witwyn
60 g donkersjokolade, in blokkies gebreek
fyn gekapte pietersielie (opsioneel)
Voorverhit die oond tot 180 °C. Smeer ’n oondbak of -pan.
- Draai die hoender met sy rugkant na bo. Gebruik ’n skerp skêr en sny die ruggraat uit deur alkant langs die ruggraat te sny.
- Draai die hoender om sodat dit met sy borskant na bo lê en druk hard met jou handpalm op die borsbeen sodat die hoender plat lê.
- Geur die meel met die sout en peper en bestuif die hoender daarmee. Plaas die hoender in ’n oondpan.
- Verhit ’n bietjie olie in ’n pan en braai die ui en knoffel tot sag. Voeg die speserye, tamaties en wyn by, geur met die sout en peper en laat kook tot geurig.
- Giet die sous oor die hoender en bak sowat 45 minute tot sag en gaar. Verwyder die hoender uit die oond.
- Pak op ’n dienbord en hou eenkant. Voeg die sjokolade by die gedreineerde pansous en verhit tot dit gesmelt het. Giet oor die hoender. Garneer met die pietersielie, indien verkies.
- Sit voor met rys waarby gebraaide groen soetrissie, gekapte pietersielie en koljanderblare gemeng is.